9 Lüt inkl. Toureleiter verlönd s`näblige Wasserschloss. Im Zug s`Limatttal düruf en ungetrüebti blaui Sicht durs wite Zürioberland. S`städtische Uschter hemmer scho gli hinder üs und mir gönd uf d`Höchi, en Erhebig mit wiiter Sicht i die ferne Alpe, wo mer scho de eint oder ander Spitz mit Name benenne. De Meischter Froscht hed d`Landschaft a mängem Eggli chli verzauberet und de Biswind blost mit de goldig schienende Wintersunne um d`Wetti. Es liechts Waldgebiet, en schöne Picknickplatz mit me Ussichtspunkt, s`Römerbrünneli, und witer über Seegräbe mit schmucke Rigelhüser und em Jukerhof verbi. Nitzi durab wandernd strahlet üs de Pfäffikersee entgäge. Am Ufer entlang hets mäng versteckte Vogelschauplatz. Im Schutz vo höchem Schilf hend d`Wasswevögel ehri Rueh. Mir sind froh um üsi Chappe und wattierte Chleider. Ueber es Brüggli macht üs di i dem Gebiet heimeschi Kollegin druf ufmerksam, dass wemmer Glück het mängisch en Isvogel z`gseh isch a dem Bach. Mir hend Hunger und sind froh i de schmucke Wirtschaft Hecht amene gmüetleche Mittagstisch a de Wärmi chönne Platz z`näh. Suurchrut mit Wadtländer Saucisson (leider hets nur no zwöi vo dem Tagesmenue), defür isch d`Wurscht umso grösser. - Die andere Tageställer gsend au lecker us aber choschted leider e chli meh.
Witer am See entlang am schön restaurierte Kastell Irgenhausen verbi und churz vor Kempte ame Bächli entlang chömemer as Ziel vo üser Tour und fahred via Pfäffike Richtig Züri. Mir säge T`schau Nada, du hesch üs no paar bemerkenswerti Sache zeigt. Im Stadelhofe stige drü vo üs us, um de Wiehnachtsmärt uf em Sächsisüteplatz z`bestune und aschliessend no de Liechterspektakel bim Landesmuseum. Wörkli Sehenswärt und en schöne Abschluss vo däm gschänkte Tag. Am TL Peter es härzlechs 'DANKE', mir hends gnosse mit Dir.
Berta Schneiter
Fotos: Peter Hartmann
