12 Teilnähmer: Alli guet ipackt i Chappe, Häntsche und winddichti Chleider.
Steckbrief Wätter: Sunne, Schneegestöber, Windböe, klari Sicht, Temperatur 0°.
Naturerläbnis: Aue Chly Rhy bi Rietheim. De Uftakt derzue vo Zurzach här isch de kunschtvoll us Wyde bauti Ussichtsturm, womer über ne schöni Holzbrugg erreicht und über ne Iseleitere cha bestiege. Aschliessend folgemer em Wanderwäg zwösche Grasland, Wassertümpel, Sand- und Chiesbänk, Pionierbaumarte wie Silberweide und Papple. Em Biber sini Spure sind nid z`überseh. De Isvogel het sich ned zeigt und för d`Orchis müesst me zunere andere Zyt cho. Vo de Ussichtsplattforme het mer e interessante Blick über das wunderbar renaturierte Schutzgebiet.
Kulinarisch wärde mir im 'Kebap House' z`Koblenz verwöhnt. Kebap, Döner, Falafel, Chästoast und ganzi Menue wärde üs i üppiger Usfüherig und ruck zuck härezauberet vonere sehr fründleche Bedienig. Es isch e wahre Jubel usbroche agsichts vo dene gluschtige Leckereie. De Zytplan isch allerdings e chli dürenand cho, sodass mer anstatt of d`Fähre noch Full, de Wäg z`Fuess über de Zoll und de Rhyuferwäg zum Städtli Waldshuet gnoh hend. En feine Kafi mit ere Riseuswahl vo Torte bietet de süessi Abschluss vo dem winterliche Alass. Einegi gönd no chli go flaniere und go lädele. Em Toureleiter en härzleche Dank für die schöni und interessanti Tour.
Berta Schneiter
Fotos: Beni Bill
